glōssa.dk

Dansk | Deutsch | English | ‘Ελληνιστί | Latine

In hoc loco commentariolos, quos in studiis conscripseram, atque textos versionesque, quæ ad materias pertinent, divulgavi. quorum operum alia sunt artificiosiora (quæ præcipue ad grammaticam pertinent), alia indoctis faciliora.

de me ipso

XXXIX annos natus sum, atque in Vejlby, suburbio Arhusiæ in septentrionem spectanti, cum conjugi Jakob vivo. profiteor utramque linguam in Instituto antiquæ novæque philologiæ Scholæ Arhusiensis. nomen meum proprium Anglice atque familiare Danice enuntiatur (i.e. ['dʒɒ:dʒ 'heŋə]); quæ difficultas nulla est affectatio, sed res familiares non minus difficiles reddit.

Præter amorem linguæ rerum quoque divinarum, sapientiæ, rerum publicarum studiosus sum, si re vera isti tres equi uni jugo subdi possunt. ergo de plurimis rebus opiniones habeo interdum firmissimas sed semper disertissimas: factioni sociali democraticæque faveo, neque optimum bonum necessitatibus contrarium esse puto; atque christianus sum, nec liberam contemplationem Deum impugnare puto. attamen si Veritatem ut nomen proprium scribere audes, illam sententiam oportet non solam vel absolutam manere, sed alteram particula ‘igitur’ exornatam subsequi.

de quæstionibus

Dissertatione de sermone lyrici Alcmanis conscripta annis MMII et III in instituto Pontico fundationis primarum quæstionum Danicæ studia Scytharum, quomodo ab Herodoto descripti sint, persecutus sum. postea, a. MMIV usque ad a. MMVII, fundatione Carlsbergiana patrona in instituto studiorum oratoriorum Scholæ Arhusiensis epistolis Latinis ratione rhetorica grammaticaque inquirendis deditus eram.

Nunc denique perscrutor quemadmodum linguæ ad tuitionem sui pertineant atque qua ratione hæc quæstio a doctis investigetur; ceterum societatis Hauniensis radicarum linguarum Europæarum investigandarum externus sum particeps.